काठमाडौं । कोरोना भाइरसको महामारिको संक्रमणबाट संसार आक्रान्त छ । यस भाइरसको सक्रमणको तिब्रता र भ्याक्सिनको विकास भइ नसकेको कारण मान्छे मान्छे बिच दुरी कायम गर्नेर भिडभाडलाई रोक्न लकडाउनको उपाय संसारका प्राय देशहरुले लागु गरेका छन् । नेपालमा पनि सरकारले चैत ११ गतेदेखि विभिन्न चरणमा गरेर लकडाउन लागु गरेको ५० दिन भन्दा बढी भइसकेको छ र यही जेठ ५ गतेसम्मको घोषित लकडाउन यथावत नै छ । लकडाउनका कारण मानिसको आवतजावत थप्प छ, अत्यावश्यक सेवा क्षेत्र बाहेक अन्य आर्थिक गतिबिधि प्राय सुन्य रहेको छ । दैनिक ज्यालादारी तथा मजदुरी गरिखानेहरूले साँझबिहान हातमुख जोर्न नपाएपछि मानवीय भावनाद्वारा ओतप्रोत मानिसहरूले टोलटोलमा सामूहिक भोजन गराउँदै आएका छन् । यसका लागि स्थानिय तहसँग समन्वय गर्न, सामाजिक दुरी कायम गराउन, स्वास्थ्य परिक्षण र सरसफाइ लगायतमा ध्यान दिन, ब्यक्तिगत तथ्यांक दुरुस्त राख्न सम्बन्धित निकायले अनुरोध गरेको सुनिनमा आएकोछ । विभिन्न स्थानमा सामूहिक भोजन गराउने क्रम चलिरहँदा आफ्नो क्षेत्रका गरीव दुःखीहरूलाई सामूहिक भोजन गराउनुपर्ने आवश्यकता महशुस गरी सितला मा.वि. बालाजु हाईटमा यही बैशाख २० गते देखि प्रकाश बलामि, दिलिपराज वन्त, देवेन्द्र कुमार श्रेष्ठ, बुद्धिमान श्रेष्ठ, गोकुल वस्ती, कविता बस्नेत ‘श्रेष्ठ’, शुक्रलाल श्रेष्ठ, उपेन्द्र श्रेष्ठ, महेन्द्र कुमार श्रेष्ठ र राजेन्द्र भण्डारी लगायतको समूहले सामुहिक मेस संचालन गरेका छन् । विद्यालयका प्र.अ. शुक्रलाल श्रेष्ठले प्रमुख व्यवस्थापकको जिम्मेवारी वहन गर्नुभएको छ । निकै व्यवस्थित भनी प्रशसित यस मेसमा खरिबोट, बोहराटार, बालाजु हाईट, वनस्थली, दुङ्गेधारा मात्र होइन, नयाँबजारक्षेत्रबाट समेत मानिसहरू खानका लागि जाने गरेका छन् । सुरुका दिनमा मेसमा १५० जनाको सहभागिता हुने गरेको भएपनि हाल विहान २५० र साँझ २५० जनाभन्दा बढीलाई यस मेसबाट खाना खुवाउने काम भइरहेको बुझिएकोछ । हाल आवश्यक ब्यक्तिले मात्र यस मेसबाट सेवा लिन सकिने गरी कुपनको व्यवस्था गरिएको र घरमै खानाको व्यवस्था गर्न सक्ने ब्यक्तिको पहिचान गरी कुपन फिर्ता लिने काम समेत गरेको मेस संचालक समितिका संयोजक प्रकाश बलामिले जानकारी दिनुभएको छ । सुरुको दिनमा मेस संचालकहरूले आफआफैले रकम उठाएर खर्च गरेकोमा खाना मेसमा सहभागीहरूको संख्या दैनिकरूपमा बढ्दै जाँदा अहिले एकै दिनमा २ बोरा चामल र १२ किलोसम्म दाल खर्च हुने भएपछि उक्त खर्चलाई भरथेग गर्न स्थानीय ब्यापारी, व्यवसायी, समाजसेवीहरूले समेत सहयोग गर्न थालेको र यसरी दालचामलको सहयोग आउन थालेपछि मेस संचालकहरूले नुनतेल, जिरामसला र केही अपुग वस्तुहरू व्यवस्थापन गरिरहेको छ । बिहान बेलुका गरी ५०० को हाराहारिमा खाना खानेहरू आउने भएकोले अहिले दैनिक रु २५ हजार जति खर्च हुने गरेको र मेसमा सहभागीहरूलाई दालभात, तरकारी, अचारका साथ हप्तामा एकछाक मासु दिनेगरी व्यवस्थापन गरिएको मेस संचालक समितिका दिलिपराज वन्तले बताउनुभयो । हाललाई यस मेस जेठ ५ गतेसम्म सञ्चालन गर्ने तयारी रहेको र त्यस पछि स्थितिको मुल्यांकन गरी साथीहरु बिच छलफल पश्चात अरु निर्णय गर्ने मेस संचालक समितिका सचिब देबेन्द्र श्रेष्ठले जानकारी गराउनु भयो । कोरोना भाइरसको महामारी र त्यसबाट बच्न अपनाइएको लकडाउनले दैनिक ज्यालादारी गरी खाने मजदुरहरु सबैभन्दा बढी मारमा परेका छन् । विगतमा अन्य विविध संकटका बेला सरकारले आर्थिक राहतको प्याकेज घोषणा गर्दा वा रोजगारी सिर्जनाको योजना बनाउँदा यस सीमान्त मजदुर तप्का सधै छुट्ने गरेका छन् । तर यस महासंकटको बेला सरकारलाई यसका लागि छुट हुनसक्ने छैन , किनभने यसपटक आर्थिक गतिबिधि सामान्य हुन लामो समय लिन सक्ने देखिन्छ । मेसमा खाना खाएका एक जना ज्यालादारी मजदुरले लकडाउन भरी त यहाँ परिवार समेतले खाना खान पाएका छौ, तर लकडाउन सकिए पछि यसरी खान पाइदैन होला अनि भोकमरीले मर्ने पो होकि भन्ने चिन्ता र लाचारी सहितको भनाइबाट पनि स्थितिको भयावहता महसुस गर्न सकिन्छ । तर प्रत्येक राष्ट्रिय संकटमा नेपालीहरुले देखाउने देशभक्ति र मानबियताको भावनाले निरासाका बिच आशा र उत्साह सञ्चार हुने गरेका छन् । यस्ता मेस सञ्चालनको गतिबिधि नेपाली नेपाली बिच एकता र विश्व मानबियताको सेतुको प्रतिक र संकेतको रुपमा रहेको छ । Categorized in

काठमाडौं – चन्द्रागिरी मच्छेगाउँ बस्ने एक महिलामा कोरोना संक्रमण पुष्टि भएपछि चन्द्रागिरी ९ वडा कार्यालयले सार्वजनिक स्थलमा तरकारी बेच्न प्रतिबन्ध लगाएको छ । चन्द्रागिरी ९ वडा कार्यालयमा मंगलबार बसेको स्वास्थ्यकर्मी, सुरक्षाकर्मी र वडा समितिको बैठकले सार्वजनिक स्थलमा तरकारी बेच्न, गाडीमार्फत तरकारी र फलफूल बिक्री गर्न पनि रोक लगाएको छ । वडाध्यक्ष देवेन्द्र महर्जनले सूचना जारी गरी निर्माण सामग्री ढुवानीमा पनि पूर्ण रुपमा रोक लगाएको छ । वडा कार्यालयले अत्यावश्यक कामबाहेक घरबाहिर ननिस्कन, निस्कनै परे मास्क लगाएर निस्कन र कुनै पसलमा जाँदा सामाजिक दूरी कायम गराउन पनि आग्रह गरेको छ । Categorized in

विजयरत्न असंबरे

---

संसारभरी फैलिरहेको कोरोना भाइरसको कारण सिर्जित महामारी कोभिड१९ बाट सुरक्षित हुनकालागि जारी गरिएको लकडाउन लम्बिंदै गएको कारण सिर्जना भएको विषम परिस्थितिबाट सबैकलागि विभिन्न किमिमले राहत पुर्याउने कार्यहरु पनि भईरहेको छ भने विशेषगरी ललितपुर जिल्लाको पाटन शहरभित्रका सहकारी संस्थाहरुले आ–आफ्ना सदस्यहरुकालागि विभिन्न किसिमका राहत प्याकेजहरुको व्यवस्था गरिंदै आएको पाईएको छ । यसै क्रममा पाटन शहरको स्कोप बचत ऋण तथा सहकारी लिमिटेडले आफ्ना सदस्यहरुकालागि सुपथ र सरल मुल्यमा खाद्यान्न लगायत दैनिक उपभोग्य सामानहरु उपलब्ध गराउँदै आएको छ भने पाटन कै जागरुक महिला बचत ऋण तथा सहकारी लिमिटेडले पनि आफ्ना सदस्यहरुकालागि खाद्यान्न वितरण गरेको छ । आज बुद्धबार यस जागरुक महिला बचत ऋण तथा सहकारी लिमिटेडले आफ्नो कार्यालय परिसरमा चामल , नुन लगायतका दैनिक उपभोग्य सामानहरु वितरण गरिएको छ । महामारीले संक्रमण फैलाउँदै लगेको यस विषम परिस्थितिमा स्वास्थ्य रक्षा गर्न र रोग प्रतिरोधात्मक शक्ति बृद्दि गर्न आयुर्वेदिक औषधी समेत वितरण गरेको कुरा बागमति प्रदेशका समानुपातिक सांसद माननीय शोभा शाक्यले बताउनु भयो । उहाँ यस सहकारी संस्थाका संस्थापक अध्यक्ष हुुनु हुन्छ । यस संस्थाका वर्तमान अध्यक्ष कृष्णलक्ष्मी बाराहीले , “ यो सहकारी संस्थामा ९०० जना सदस्य रहेका छन् भने हालकोलागि पहिलो चरणमा अति आवश्यक खाद्यान्न र स्वास्थ्य रक्षाकालागि आर्युेवेद औषधीमात्र उपलब्ध गराएका हौं । पछि अवस्था हेरेर आवश्यक परेमा राहतका अरु कार्यहरु पनि गर्दै लग्नेछौं । ” भनि आफ्नो प्रतिबद्दता पोख्नु भयो । Categorized in

काठमाडौं – मध्यपुर थिमी नगरपालिका वडा नं ४ शंखधर साख्वा चोक बस्ने स्वास्थ्यकर्मीमा मंगलबार कोरोना संक्रमण पुष्टि भएपछि थिमि शंखधर साख्वाः चोक वरपरको क्षेत्र सिल गरिएको छ । संक्रमण फैलिन नदिन भन्दै जिल्ला प्रशासन कार्यालयले सिल गरिएपछि त्यस क्षेत्रमा यातायात चल्न निषेध गरिएको छ । प्रहरीले सबैजसो सडकमा डोरी टाँगेर र बार राखेर बन्द गराएको छ ।

ललितपुरको निदान अस्पताल र आरोग्य फाउण्डेशन पनि सिल

आरोग्य फाउण्डेसनमा कार्यरत स्वास्थ्यकर्मीमा कोरोना भाइरस संक्रमण देखिएपछि बुधबार आरोग्य फाउण्डेसन र निदान अस्पताल पनि सिल गरिएको छ । कोरोनाको सम्भावित संक्रमणको जोखिम कम गर्न दुवै स्वास्थ्य संस्थाको भवन सिल गरिएको प्रहरीले जनाएको छ । सिल गरिएको भवनमा सुरक्षाकर्मीले पस्न निषेध गरिएको छ । Categorized in

विजयरत्न असंबरे

---

कोरोना भाइरस कोभिड १९ को माहामारी फैलिरहेको यो समयमा लकडाउनको कारणले प्रभावमा परेका पत्रकारहरुलाई उपत्यका सरोकार मञ्च तथा उपत्यका व्यापि सडक विस्तार पीडित संघर्ष समितिले सघाएको छ । उक्त संस्थाहरुले दाल, चामल, आँटा, दालमोठ, लाखामरी, चिउरा, चिनी, तरकारी गरी १९ थरी खाद्य सामग्री उपलब्ध गराएको हो । ती सामग्री नेवाः पत्रकार राष्ट्रिय दबूको संयोजनमा आवश्यकताको प्राथमिकताका आधारमा वितरण गरिने पत्रकार राष्ट्रिय दबूले जनाएको छ । उपत्यका सरोकार मञ्च र उपत्यका व्यापि सडक विस्तार पीडित संघर्ष समितिका अध्यक्ष सुमन साय्मि, उपाध्यक्ष विद्या श्रेष्ठ, सचिव रविन्द्रकुमार श्रेष्ठ र सदस्य विकासबाबु श्रेष्ठले सो हस्तान्तरण गर्नुभएको हो । पत्रकार राष्ट्रिय दबूका केन्द्रीय अध्यक्ष सुरजबीर बज्राचार्य, ललितपुर जिल्ला अध्यक्ष सागर महर्जन र ललितपुर जिल्ला कार्यसमिति सदस्यहरुको प्रतिनिधि मण्डलले सहयोग ग्रहण गरेका थिए भने आवश्यक परेका काठमाडौं उपत्यकाका नेवाः पत्रकारहरुलाई वितरण गर्ने प्रतिबद्धता व्यक्त गरेका थिए । यसैबीच किर्तिपुर नगरपालिकाले पनि पत्रकारहरुका लागि सहयोग गरेको छ । नगरपालिकाले चामल, दाल लगायतका दैनिक जीवनका अत्यावश्यक सामग्री सहयोग गरेको हो । Categorized in

ललेन्द्र शाक्य

---

कीर्तिपुर – नेवार पत्रकार र कीर्तिपुरका मेयर रमेश महर्जनबीच विविध विषयमा छलफल भएको छ । कीर्तिपुर नगरपालिकाको भवनमा शुक्रबार भएको छलफलमा नेवाः पत्रकार राष्ट्रिय दबूका पदाधिकारीहरु उपाध्यक्ष नृपेन्द्रलाल श्रेष्ठ, केन्द्रीय सचिव सुनिल महर्जन, केन्द्रीय कोषाध्यक्ष सुरेन्द्रभक्त श्रेष्ठलगायत नेवाः एफएम १०६.७ का प्रबन्ध निर्देशक वीरेन्द्र विनु शाक्य विविशा, कीर्ति अनलाइनका म्यानेजिङ डाइरेक्टर प्रताप महर्जन र विभिन्न संचार क्षेत्रका प्रतिनिधिहरुको उपस्थिति थियो । उक्त छलफल कार्यक्रममा पत्रकारहरुको गुनासोलाई लिएर मेयर महर्जनले नगरपालिकाको आर्थिक बजेट, विकास र रकम रकमान्तर सम्बन्धमा जानकारी दिएका थिए । यसैगरी मेयर महर्जनले कीर्तिपुर नगरपालिकादुने अहिलेसम्म दुई चरणमा गरी ८ हजार परिवारलाई राहत वितरण गरिसकेको र १५ सयभन्दा बढी त्रिभुवन विश्वविद्यालयका विद्यार्थीहरुलाई स्वयं नगरपालिको राहत वितरण गरेको जानकारी पनि दिए । छलफल कार्यक्रममा कीर्तिपुरभित्र बाहिरबाट मानिसहरु आएका छन् वा छैनन् वा आएका भए कस्तो व्यवस्था छ भन्ने पत्रकारहरुको प्रश्नमा मेयर महर्जनले बताए, “हुनत अहिले तराईबाट आएका चारजनालाई कीर्तिपुर नगरपालिकाको क्वारेन्टाइनमा व्यवस्थित रुपमा राखिएको छ । अहिले बाहिरबाट आएका मानिसहरु कसैले थाहा नपाई भित्र भित्र उनीहरुकै जिल्ला पठाउने भइरहेको छ । बाहिरबाट आएकाहरु एक ठाउँबाट अर्को, अर्कोबाट अर्को क्यारेमबोर्डको गट्टी जस्तो नहोस् भनी व्यवस्थित रुपमै उनीहरुलाई आफ्नै ठाउँमा पठाउने भइरहेको छ । यस कार्यमा नगरपालिका सफल पनि भइरहेको छ ।” मेयर महर्जनले कीर्तिपुर नगरपालिकाको नाकाको विषयमा खास त्यति समस्या नै नरहेको जनाउँदै भने, “कीर्तिपुर नगरपालिकामा नाका नै छैन भने पनि हुन्छ । किनभने कीर्तिपुर नगरको सिमाना भन्नु नै दक्षिणकाली र चन्द्रागिरी नगरपालिका हो । दक्षिणकाली र चन्द्रागिरी नगरपालिकाले कडा रुपमा कदम उठाएमा कीर्तिपुर नगरपालिकालाई कुनै समस्या आउने छैन । यसैगरी नाका कडिकडाउ गर्न ती नगरपालिकालाई कीर्तिपुर नगरपालिकाले पनि सहयोग गरिरहेको छ” भन्ने जानकारी दिएका थिए । मेयर महर्जनले लकडाउन झनै लम्बिँदै गएको अवस्थामा कीर्तिपुर नगरका जनसमुदायलाई डर, त्रासमा नभई सचेत र सतर्क भई कोरोना भाइरससँग सामना गर्न अनुरोध गर्दै नेपाल सरकारले घोषणा गरेको लकडाउनलाई पूर्णरुपमा पालना गर्न आह्वान पनि गरेका थिए । (यहाँ क्लिक गरी भिडियो हेर्नुहोला । भिडियो सौजन्य : नृपेन्द्रलाल श्रेष्ठ) Categorized in

काठमाडौं – काठमाडौं महानगरपालिका १५ वडास्थित ब्यसल टोलमा प्राचीन ढुङ्गेधारा फेला परेको छ । प्राचीन ढुङ्गेधारा भेटिएको खबर प्राप्त भएपछि सम्पदा अभियन्ता यादवलाल कायस्थको नेतृत्वमा एक टोली सो स्थानमा पुगेको थियो । भेटिएको उक्त प्राचीन ढुङ्गेधाराबारे पुरातत्व विभागलाई जानकारी गराइसकेको कायस्थले जनजाति खबरलाई बताएका छन् । पानी सुकेको अवस्थामा फेला परेको ढुङ्गेधाराको मुहान र प्रणालीबारे चाँडै अध्ययन हुने पनि अभियन्ता कायस्थले जानकारी दिएका छन् । काठमाडौँ उपत्यका खानेपानी व्यवस्थापन बोर्डले काठमाडौँ उपत्यकाभित्रका १० वटा नगरपालिका क्षेत्रभित्र रहेका ढुङ्गेधारा तथा पोखरीको स्थलगत अध्ययन गरी तयार पारेको ‘काठमाडौँ उपत्यकाभित्रका ढुङ्गेधारा तथा पोखरीको लगत नक्साङ्कनसम्बन्धी’ पुस्तकमा काठमाडौँ उपत्यकाको १० वटा नगरपालिकाभित्र ५७३ ढुङ्गेधारामध्ये स्थलगत अध्ययनका क्रममा ४७९ वटा मात्र भेटिएको पुस्तकमा उल्लेख गरिएको छ । ५२ वटा ढुङ्गेधारा मासिएको पाइएको पुस्तकमा उल्लेख छ । स्थलगतरुपमा खोजीका क्रममा ४२ वटा पत्ता नलागेको अवस्थामा छ । यो पनि पढ्नुहोस् : ऐतिहासिक महत्वका ढुङ्गेधारा ओझेलमा Categorized in

विजयरत्न असंबरे

---

ललितपुर – कोरोना भाइरसको जोखिमका कारण ललितपुरमा यस वर्ष २५६४ औं बुद्ध जयन्ती समारोह औपचारिकतामा सीमित हुने भएको छ । ६८ वर्षदेखि निरन्तर बुद्ध प्रतिमासहित नगर परिक्रमा, ज्ञानमाला भजनलगायतका कार्यक्रम हुँदै आएकोमा यस वर्ष कोरोना संक्रमण रोकथामको लागि स्थगित गरिएको २५६४ औं बुद्ध जयन्ती मूल समारोह समितिले शुक्रबार एक प्रेस विज्ञप्तिमार्फत जानकारी गराएको छ । समितिले यस वर्ष सामाजिक दुरी कायम गरी सीमित व्यक्तिहरुको सहभागितामा बुद्ध वन्दना र बुद्ध पूजा गरी बुद्ध जयन्ती मनाइने जानकारी समेत गराएको छ । समितिले आफ्नै घरघरमा बसी दीप प्रज्वलन एवं बुद्ध वन्दना गरी यस वर्षको बुद्ध जयन्ती मनाउन पनि आग्रह गरेको छ भने कोरोना भाइरस संक्रमणबाट निधन भएकाहरुको सुखावती भुवनमा बास तथा संक्रमितको स्वास्थ्य लाभको कामना समेत गरेको छ । यस वर्ष बुद्धजयन्ती समारोह आयोजनाको पालो लिच्छिवी राजा शिवदेव संस्कारित ओंकुलि श्री रुद्धवर्ण महाविहार ओकुबहाःको रहेको छ । Categorized in

काठमाडौैं – लकडाउनको समय काठमाडौंबासी नेवार समुदायलाई सस्तो दरमा तरकारी उपलब्ध गराउन काठमाडौं १७ वडामा ‘नेवाः गुहालि पुचः’का युवाहरुले तरकारी पसल सञ्चालनमा ल्याएको छ । लकडाउनको समय तरकारीको भाउदर समान हुन नसकेको र भित्री सहरका बासिन्दा तथा नेवार समुदायले बाध्य भएर महँगोमा तरकारी किन्नु परिरहेकोले सस्तो दरको तरकारी पसल सञ्चालनमा ल्याइएको हो । १७ वडा श्रीघ विहारबाहिर क्षेत्रपाटी जाने बाटोमा सो तरकारी पसल खोलिएको छ । त्यहाँ कालिमाटी बजारमा दिने दरमा थोरैमात्र नाफा जोडेर तरकारी बिक्री भइरहेको छ । साथै १७ वडा बासिन्दाले फोन गरेकै भरमा घर–घरमा तरकारी पु¥याउने व्यवस्था पनि गरिएको छ । किलागल टोलस्थित स्टार क्लबका अध्यक्ष चन्द्र महर्जनले लकडाउनको समय कालिमाटी तरकारी बजारमा किलोको २० रुपैयाँ पर्ने काउली बजारमा १०० रुपैयाँमा बिक्री भइरहेको र स्थानीयले बाध्य भएर किन्नु परिरहेकोले स्थानीय युवाकै सक्रियतामा सस्तो दरको तरकारी पसल सञ्चालनमा ल्याएको बताएका छन् । केही दिनअघि इतुंबहालभित्र कोरोनाबाट बच्ने तथा तरकारी बजारमा स्थानीय युवाको सहभागिता विषयमा खुल्ला बैठक भएको थियो । यसै बैठकको निर्णयअनुरुप अब केही दिनमै न्हाय्कंटोल, नरदेवी, जनबहाल, असनमा पनि सस्तो दरको तरकारी पसल खोल्ने तयारी भइरहेको महर्जनले जनाएका छन् । Categorized in

विजयरत्न असंबरे

---

ललितपुर– ललितपुर सुनचाँदी व्यवसायी संघले नेपालमा सुनचाँदीको गहना बनाई जीविकोपार्जन गर्दै आएका भारतीय मूलका बंगाली कालिगढहरूलाई राहत प्रदान गरेको छ । लकडाउन अवधि लम्बिएसँगै सुनचाँदीका काम गर्ने कालिगढहरूलाई दैनिकी चलाउन कठिनाई हुँदै गएपछि राहत वितरण गरिएको कुरा संघका कार्यवाहक अध्यक्ष मोतिमान शाक्यले जानकारी दिएका छन् । पाटन मंगलबजारको हःखा कोतपाटीमा सबै कालिगढहरूलाई बोलाएर खाद्य सामग्री वितरण गरिएको थियो । संघका कार्यवाहक अध्यक्ष शाक्यका अनुसार २ सयजना कालिगढलाई प्रति व्यक्ति चामल ५ किलो, आँटा ३ किलो, दाल १ किलो, नुन १ पाकेट, चिनी १ किलो वितरण गरिएको छ । राहत पाएपछि कालिगढहरूलाई खुशी हुँदै घरतिर लागेका थिए । “संकटको समयमा भारत घर जाने अवस्था छैन । भारतमा पनि अहिले लकडाउन छ । यहाँ बस्न पनि निकै कठिन भयो । यस्तो बेला राहतले केही समय ढुक्क हुने अवस्था बनाएको छ,” कालिगढ दीपक हुनियाले बताए । महानगरपालिकाले दिएको राहत प्रायः कालिगढहरूले नपाएकाले संघले राहत वितरण गरेको महासचिव विपिन शाक्यको भनाइ छ । एकजना कालिगढलाई एक महिना पुग्ने खाद्य सामग्री प्रदान गरिएको संघले जनाएको छ । संघले दोस्रो चरणको राहत नेपाली कालिगढलाई दिने योजना बनाएको छ । ललितपुर क्षेत्रमा रहेर काम गरिरहेका करिब दुई सयजना भारतीय कालिगढहरुलाई राहत वितरण गरिएको ललितपुर सुनचाँदी व्यवसायी संघका निर्वतमान अध्यक्ष किरणभाई बज्राचार्यले बताए । Categorized in