काठमाडौँ - सरकारी लगानीको साझा यातायातले भोलिबाट बस सेवा शुरु गर्ने भएको छ । साझाले २६ वटा बसमार्फत् काठमाडौँका अधिकांश रुटमा सेवा शुरु गर्न लागिएको हो ।

पहिलो दिन सरकारले तोकेअनुसार नै सिटभन्दा आधा यात्रु राखेर बस सञ्चालन गर्न लागिएको साझाका व्यवस्थापक महेन्द्र पाण्डेले बताउनुभयो । बसका कर्मचारी र यात्रु दुवैले आवश्यक सुरक्षाप्रति सर्तक हुने गरी बस सञ्चालन गर्न लागिएको छ । उहाँका अनुसार यात्रुले साझाका बसमा चढ्दा माक्स लगाउने, सेनेटाइजरको प्रयोग गर्ने र सामाजिक दुूरी कायम गर्नेसँगै खुद्रा पैसा बोकर मात्रै बसमा यात्रा गर्नुपर्छ । उहाँले भन्नुभयो, “बसका कर्मचारीले पनि माक्स, पञ्जा र सेनेटाइजरको व्यवस्था गरिएको छ ।”

पहिलेकै रुटमा सामान्य अवस्थाभन्दा कम बसबाट सेवा शुरु गर्न लागिएको साझाले जनाएको छ । पहिले थोरै बसबाट शुरु गरिएमा आवश्यकतानुसार थप गर्दै जाने व्यवस्थापक पाण्डेले बताउनुभयो । सरकारले तोकेअनुसार नै भाडा लिइनेछ । मन्त्रिपरिषद्को बैठकले सार्वजनिक यातायात सञ्चालनको निर्णय गरेपछि पनि यातायातले बसको मर्मतलगायतका तयारीका काम गरिरहेको थियो । यातायात व्यवस्था विभागले औपचारिक रुपमा पत्र नदिएकाले सेवा शुरु गर्न नसकेकामा पत्र प्राप्त भएसँगै शुरु गरिएको हो ।

उहाँले भन्नुभयो, “आगामी दिनमा आवश्यकतानुसार सेवा विस्तार हुनेछ ।” विसं २०१९ सालबाट बस सेवा शुरु गरेको संस्थाले विगतमा सबैभन्दा लोकप्रिय सवारी साधन मानिन्थ्यो । विभिन्न समस्याका कारण विसं २०६४ मा अवरुद्ध सेवा विसं २०७० मा पुनः स्थापित भएको हो । काठमाडौँ उपत्यकामा १० रुट रहेकोमा साझाको उपत्यका बाहिर पनि सेवा विस्तार गरेको छ । संस्थाले काठमाडौँ उपत्यकामा अपाङ्तामैत्री सेमी लो फ्लोर बस सञ्चालनमा ल्याएको छ ।

भक्तपुर - भक्तपुर नगरपालिकाले यसवर्ष जात्रा एवं पर्वलाई औपचारिकतामा मात्रै सीमित गर्ने भएको छ ।

भक्तपुर नगर कार्यपालिकाको बैठक र सरोकारवालासँगको छलफलले जात्रा एवं पर्वलाई औपचारिकतामा मात्रै सीमित गर्ने निर्णय गरेको भक्तपुर नगरपालिकाका प्रमुख सुनिल प्रजापतिले जानकारी दिनुभयो ।

साउन कृष्ण चतुदर्शीका दिन मनाउने गथांमुगः अर्थात घन्टाकर्ण पर्व यसवर्ष साउन ४ गते परेको छ । यो पर्वमा नर्कट तथा छ्वालीबाट बनाइएका घण्टाकर्ण अर्थात गथाःमुगलाई भक्तपुरमा रहेका नेवार बस्तीबाट सर्वसाधारणले बाजागाजासहित प्रत्येक दोबाटो, तीनदोबाटो र चौबाटोमा लगेर जलाउने गरिन्छ ।

त्यसैगरी भाद्र शुक्ल प्रतिपदाको दिनबाट शुरु भई आठ दिन मनाइने गाईजात्रा पर्वलाई पनि औपचारिकतामा मात्रै सीमित गर्ने र घिन्ताङघिसी नाच देखाउन नपाइने, अन्य प्रस्तुतिहरु गर्न नपाइने निर्णय गरिएको भक्तपुर नगरपालिकाका प्रमुख प्रजापतिले जानकारी दिनुभयो । यसवर्ष गाईजात्रा साउन २० गतेदेखि २७ गतेसम्म परेको छ ।

गाईजात्रामा वर्षभरिका मृतकहरुको सम्झनामा गाईको प्रतीकस्वरुप माटोको गाई, डोकसाँ र ताहामचासँगै लठ्ठी जुधाएर मौलिक रुपमा मनाइने घिन्ताङघिसी नाच उपत्यकामध्ये भक्तपुरको प्रमुख विशेषता हो ।

गाईजात्रामा हास्यव्यङ्ग्य, घोचपेच, देवी नाच, भैरव नाच, लुसी नाच, माक प्याखँ (बाँदर नाच), नागांचा प्याखँ, मयूर नाच, ख्याक नाच, खिचा प्याखँ, भालु प्याखँ, सिंहसिंहनी नाच, कचामचा नाच, धागो काट्ने नाच, सिलु वनेगु प्याखँजस्ता अनेकौँ सांस्कृतिक महत्वको नाच प्रर्दशन गर्ने गरिन्छ ।

फाइल तस्बिर