वरिष्ठ गायक स्वयम्भूराज शाक्यको ६४ बर्षका उमेरमा निधन भएको छ ।

गत वैशाख २६ गतेदेखि उहाँ विपि स्मृति अस्पतालमा उपचार गराइरहनु भएको थियो । कोरोना संक्रमण देखिएका कारण उपचारका लागि अस्पताल भर्ना भएका शाक्यको पछिल्लो समय भने पीसीआर नेगेटिभ आएको परिवारले जानकारी गराएको छ ।

नयाँ नयाँ शैली र सृजनामा तल्लीन वरिष्ठ गायक शाक्य आफ्नै टोलमा आयोजित एकल साँझको सफलता पछि अर्को एकल प्रस्तुतिको योजनामा हुनुहुन्थ्यो ।

रेकर्डिङ सहज र सुलभ नभएको बेला एउटा कोठामा वाद्यवादक तथा गायक÷गायिका र अर्को कोठामा प्रविधि र प्राविधिकका साथ ३ दशक अघि नेपालभाषाको ‘मतिना’ रेकर्ड गराएका थिए । नेपालभाषाको सांगीतिक विकासमा कोशेढुंगाका रुपमा लिइने यस गीति संग्रहमा संग्रहित उनका सबै गीतहरु हालसम्म पनि जनजिब्रोमा झुण्डिएको छ ।

सांस्कृतिक संस्थानबाट सेवानिवृत वरिष्ठ गायक शाक्य रेडियो नेपालका विशिष्ट श्रेणीका गायक हुनुहुन्थ्यो । विभिन्न पुरस्कार तथा सम्मानबाट सम्मानित शाक्यले तिब्बत, श्रीलंका, बंगलादेश, साउदी अरेबिया, जापान, हङकङ, बैंङ्ककमा सांगीतिक प्रस्तुति दिइसक्नु छ ।

५ वटा गीति संग्रहसहित २५० भन्दा बढी गीत गाउनु भएका वरिष्ठ गायक शाक्यले ४ वटा एकल शोहरु समेत गरिसक्नु भएको छ । यल, ह:खा निवासी गायक  स्वयम्भुराज शाक्यको मङ्गलबार ( जेठ ११, बेलुकी ८ बजे ) कोरोनाका कारण बसुन्धरा हस्पिटलमा निधन भएको हो । उहाँले गायकको रुपमा ख्याति कमाउनु भएको छ भने उहाँ कलाकार परिषदका संस्थापक अध्यक्ष हुनुका साथै लहलिं नेवा: दबूको लसकुस म्ये (गीत)का  संगीतकार र गायक, नेवा: गुहालि पुच:,ह:खा र ह:खा टोल सुधार  संघकम सल्लाहकार पनि हुनुहुन्थ्यो ।

Categorized in व्यक्तित्व