ललितपुर – ललितपुर महानगरपालिकाका प्रमुख चिरीबाबु महर्जन कोरोना संक्रमणमुक्त भएका छन् । यही ८ असोजमा ज्वरो आउने र खोकी लाग्ने समस्या भएसँगै पाटन अस्पतालमा स्वाब परीक्षण गराउँदा शुक्रबार उनमा कोरोना पोजिटिभ देखिएको थियो ।

९ असोजदेखि १५ गतेसम्म निजी निवासमा रहेका महर्जन १६ गते छातीमा समस्या देखिएसँगै सानेपाको स्टार अस्पताल भर्ना भएको प्रमुखका स्वकीय सचिव इन्द्र वज्राचार्यले जानकारी गराए । उनले भने, 'आज दिउँसो ४ बजे मेयर सापको नतिजा नेगेटिभ आयो । अब उहाँ छिट्टै महानगरपालिका कार्यालयमा उपस्थित हुनुहुनेछ ।'

मंगलबार मात्रै गोदावरी नगरपालिकाका प्रमुख गजेन्द्र महर्जन र सोमबार महालक्ष्मी नगरपालिकाका प्रमुख रामेश्वर श्रेष्ठ कोरोना संक्रमणमुक्त भएका छन् ।

केही वडाध्यक्ष संक्रमित

महानगरपालिका- ८ का वडाध्यक्ष हेम महर्जन, १२ का वडाध्यक्ष नारायणलाल अवाले र नं १९ का वडाध्यक्ष विनोद ताम्राकारलाई कोरोना संक्रमण पुष्टि  भएको छ ।

ज्वरो आउने र थकाइ लाग्ने भएपछि १८ गते स्वाब परीक्षण गराउँदा आज कोरोना पोजेटिभको नतिजा आएको  ८ नं का वडाध्यक्ष महर्जनले बताए । उनले भने, 'मेरी पत्नी ज्ञानमाया महर्जनमा पनि कोरोना पोजिटिभ देखिएर  हामी दुवै होम आइसोलेशनमा बसेका छौँ ।'

रुघाखोकी लागेर असोज १३ गते स्वाब परीक्षण गराउँदा भोलिपल्ट रिपोर्ट पोजिटिभ आएको १२ का वडाध्यक्षले बताउ । उनले भने, 'मेयर सापलाई कोरोना देखिनु केही दिनअघि हामी उहाँसँगै एक बैठक बसेका थियौँ । उहाँमा कोरोना पोजेटिभ देखियो भनेर आफ्नो पनि परीक्षण गराउँदा नतिजा पोजेटिभ नै आयो ।'  

ज्वरो आउने र खानाको स्वाद थाहा नपाउने भएपछि १६ गते स्वाब परीक्षण गराउँदा १८ गते कोरोना पुष्टि भएको नं १९ का वडाध्यक्षको भनाइ छ ।

महानगरपालिकाका केही कार्यालय बन्द

असोज २० देखि २७ गतेसम्मका लागि  ८ नं वडा कार्यालय  र १९ गतेदेखि एक हप्ताका लागि  १९ नं वडाकार्यालय पूर्ण रूपमा बन्द गरिएको सम्बन्धित वडाध्यक्षले जानकारी गराए ।

वडामा कोभिड संक्रमित बढेसँगै बिहीबारदेखि २५ गतेसम्मलाई वडाका सम्पूर्ण सेवा बन्द गरिने भएको  २० नंका वडाध्यक्ष चन्द्रलाल महर्जनले बताए । उनले भने, 'आउँदो आइतबारसम्म संक्रमितको संख्या नियाल्छौँ र त्यसपछि पनि थप बढेको बढै गरेमा स्वास्थ्य सावधानी अपनाएर वडामा पुनः सेवा दिन थाल्नेछौँ ।'

अन्य केही वडाध्यक्ष पनि कोरोनाको शिकार भएका कारण आफूलगायत कर्मचारी यसबाट मुक्त रहन सकून् भनेर अर्को सूचना प्रकाशन नभएसम्मका लागि वडा बन्द गरिएको महर्जनको भनाइ छ ।

Categorized in उपत्यका