राष्ट्रपति बंगलादेशको औपचारिक भ्रमणमा जाँदै
Janjati Khabar – Janjati Khabar | २०७७ चैत्र २, सोमबार
काठमाडौँ - राष्ट्रपति विद्यादेवी भण्डारी आगामी सोमबार अर्थात चैत्र ९ गते दुईदिने औपचारिक भ्रमणका लागि बंगलादेश जाने भएकी छन् ।
अब बस्ने मन्त्रिपरिषदको बैठकले भ्रमणको मिति तय गरेसँगै भ्रमणको औपचारिक घोषणा हुने एक सरकारी अधिकारीले बताए ।
काठमाडौँस्थित बंगलादेश दूतावास स्रोतले पनि भ्रमणको तयारी भइरहेको जानकारी दिएको छ ।
बंगलादेशको स्वतन्त्रताको स्वर्ण जयन्ती तथा बंगलादेशका संस्थापक शेख मुजिबवुर रहमानको शतवार्षिकी जन्मजयन्तीको अवसरमा आयोजित कार्यक्रममा सहभागी हुन भण्डारी बंगलादेश जान लागेकी हुन् ।
बंगलादेशले शेख मुजिबवुर रहमानको शतवार्षिकी जन्मजयन्ती एक हप्तासम्म विभिन्न कार्यक्रम गरी मनाउँदैछ ।
यसअघि सन् २०१८ मा बंगलादेशका राष्ट्रपति अब्दुल हमिद नेपालको औपचारिक भ्रमणमा आएका थिए ।
Categorized in राजनीति
