नेपाली गीत–संगीतका विशिष्ट दस्तावेज नातिकाजीको ९६ औं जन्मजयन्तीका अवसरमा  राष्ट्रपति भवन शितल निवासमा आयोजित कार्यक्रममा राष्ट्रपति विद्यादेवी भण्डारीले नातिकाजी सम्मान तथा पुरस्कार वितरण गर्नु भएको छ ।

राष्ट्रपति भण्डारीले बरिष्ठ वाद्यवादक नोर्बु छिरिङ्ग लामालाई नातिकाजी राष्ट्रिय विशिष्ट स्रष्टा सम्मान २०७६ र  बरिष्ठ गीतकार तथा समाजसेवी बालकृष्ण सजिव, गीतकार सुरेन्द्र राना, बाद्यबादकराजु अग्रवाल, गीतकार सुनिल मास्के, संगीतकार राजु सिंह, गायक मदन सिंह नेपाली, संगीतकार मनोहर सुनाम, संगीतकार शान्तिराम राई, गीतकार चुडामणि देवकोटा र संगीतकार महेश खड्कालाई नातिकाजी राष्ट्रिय विशेष सङ्गीत सम्मान–२०७६ प्रदान गर्नु भएको छ ।

यस्तै, पुरस्कारतर्फ प्राश्ना शाक्य, चेतन सापकोटा, सुगम पोखरेल र दयाराम पाण्डेलाई नातिकाजी राष्ट्रिय सङ्गीत पुरस्कार–२०७६ र मेलिना राई, वसन्त सापकोटा, सुरज थापा र हर्क साउदलाई नातिकाजी राष्ट्रिय प्रतिभा पुरस्कार–२०७६ प्रदान गरिएको छ ।

नेपालभाषाका ख्यातिप्राप्त संगीतकार  जीवीत जल्मीलाई नातिकाजी राष्ट्रिय सङ्गीत संयोजक तथा वाद्य पुरस्कार–२०७६ प्रदान गरिएको छ। विकास नाथ योगीलाई नातिकाजी राष्ट्रिय शास्त्रीय सङ्गीत पुरस्कार–२०७६, बद्री पंगेनीलाई नातिकाजी राष्ट्रिय लोक सङ्गीत पुरस्कार–२०७६ वाट पुरस्कृत गरिएको छ ।

सोही समारोहमा दुई सशक्त पत्रकार विदुर गिरी र श्याम स्मृतलाई राष्ट्रपति भण्डारीबाट   नातिकाजी राष्ट्रिय कला पत्रकारिता पुरस्कार–२०७६ प्रदान गर्नु  भएको छ। पत्रकार विदुर गिरी कामना मासिकका सम्पादक तथा नेपाल समाचारपत्रका समाचार सम्पादक हुनु हुन्छ भने श्याम स्मृत नामी साप्ताहिकका सम्पादक तथा भिजन संसार डटकमका समाचार सम्पादक हुनुहुन्छ  ।

पुरस्कार वितरण समारोहमा राष्ट्रपति भण्डारीले संगीत महर्षि श्रद्धेय नातिकाजी श्रेष्ठको सांगीतिक योगदानको चर्चा गर्दै सम्मान तथा पुरस्कारले स्रष्टा तथा सर्जकहरुको योगदानको कदर भएको र त्यसमा आफू सहभागी हुन पाएकोमा गौरबता प्रकट गर्नु भयो ।

आयोजक नातिकाजी स्मृति समाजका अध्यक्ष एवम् मेलोडी किङ शंभुजीत बाँस्कोटाले संगीत महर्षि श्रद्धेय नातिकाजीको अतुलनीय योगदानको चर्चा गर्दै राष्ट्रपति भण्डारीलाई नातिकाजीको निवास कुटुवहाल चावहिललाई नातिकाजी मार्ग घोषणा गराउन सविनय अनुरोध गर्नु भयो भने बाँस्कोटाले नातिकाजी स्मृति समाजको अक्षय कोषका लागि काठमाडौं महानगरपालिकाले २० लाख दिने मेयर विद्यासुन्दर शाक्यले घोषणा गरेको पनि खुलासा गर्नु भयो।

Categorized in साहित्य-कला