काठमाडौँ - नेकपा एमालेमा अध्यक्ष केपी शर्मा ओली र माधवकुमार नेपाल समूहबीच विवाद बढ्दै गएपछि सोमबार दुबै पक्षका नेताहरुबीच पार्टी कार्यालय धुम्बाराहीमा बैठक सम्पन्न भयाे ।

बैठकमा दुवै पक्षले आ–आफ्नो अडान छाडेनन् । त्यसपछि महासचिव ईश्वर पोखरेलले पुनः छलफल गर्नुपर्ने धारणा राखे ।

बैठकमा ओलीले फागुन २८ गते आफू निकटका नेताहरुको बैठकबाट गरेको निर्णय खारेज गर्न माधवकुमार नेपाल समूहले माग गरेको थियो । त्यस विषयमा छलफल प्रारम्भ भएको थियाे ।

बैठकबारे जानकारी दिँदै नेकपा एमालेका महासचिव ईश्वर पोखरेलले सोमबार केपी शर्मा ओली र माधवकुमार नेपाल समूहको बैठकमा एमालेलाई व्यवस्थित बनाउने विषयमा छलफल भएको बताए ।

उनले बैठकमा उठेका कतिपय विषयमा आजै टुंगोमा पुग्न नसकिने भन्दै थप छलफल गर्नुपर्ने बताए । ‘अहिले हाम्रो साझा निश्कर्ष के हो भने हामीहरुले यो अवसरलाई उपयोग गरेर एमालेलाई थप व्यवस्थित बनाउनुपर्छ’ उनले भने, ‘कतिपय समीक्षात्मक कुरामा आज नै टुंगो गर्न सकिँदैन, थप छलफल गर्नुपर्छ ।’

उनले दुबै समूहले गरेको गतिविधिको समीक्षा गर्नुपर्ने विषय बैठकमा उठेको बताए । ‘२८ गतेको बैठकमात्र होइन यस बीचमा विभिन्न गतिविधि भएका छन्, अर्याल होटलमा भएका छन् । ‘समग्र रुपमा विगतमा गरिएका कामको यथासमयमा समीक्षा गरिसकेपछि उचाइमा पुगौंला’ उनले भने ।

अध्यक्ष ओलीले बालुवाटारमा भेला राखेपछि वरिष्ठ नेता झलनाथ खनाल–माधवकुमार नेपाल समूहले अर्याल होटलमा बैठक गरेर चैत ४ र ५ गते राष्ट्रिय भेला आयोजना गरेको छ ।

Categorized in राजनीति