टी–२० विश्वकप ग्लोबल छनोटमा आज नेपाल र फिलिपिन्स आमने सामने
Janjati Khabar – Janjati Khabar | २०७८ फाल्गुण ७, शनिबार
फागुन ७, काठमाडौं - नेपालले आईसीसी टी–२० विश्वकप ग्लोबल छनोट ए अन्तर्गत आज फिलिपिन्सको सामना गर्दैछ । ओमानको अल अमेरात क्रिकेट मैदानमा नेपाल र फिलिपिन्सबीचको खेल बिहान ११ः४५ बजे सुरु हुनेछ ।
नेपाल आज फिलिपिन्सलाई हराउँदै छनोटमा लगातार दोस्रो जित निकाल्न चाहन्छ भने फिलिपिन्स पहिलो जितको खोजीमा छ । नेपालले फिलिपिन्ससँग पहिलोपटक टी–२० क्रिकेट खेल्न लागेको हो ।
शुक्रबार भएको पहिलो खेलमा नेपालले घरेलु टोली ओमानमाथि ३९ रनको शानदार जित निकालेको थियो । फिलिपिन्स भने क्यानडासँग ११८ रनले पराजित भएको थियो ।
ग्लोबल छनोटका लागि ८ टिमबीच प्रतिस्पर्धा भइरहेको छ । ८ टिमलाई पनि दुई समूहमा विभाजन गरिएको छ । समूह चरणको अन्तिम खेल नेपालले सोमबार क्यानडासँग खेल्नेछ ।
फिलिपिन्ससँगकाे आजको खेल जितेमा नेपाल सेमिफाइलमा लगभग पुग्नेछ । एक समूहबाट शीर्ष दुई टिम सेमिफाइल पुग्नेछन् । सेमिफाइनलमा जित हात पारे नेपाल २०२२ को अन्तिममा अष्ट्रेलियामा हुने टी–२० विश्वकपका लागि छनोट हुनेछ ।