"ए डिभिजन लिग निर्धारित मितिमै"
Janjati Khabar – Janjati Khabar | २०७८ श्रावण ८, शुक्रबार
सहिद स्मारक ए डिभिजन लिग असोज पहिलो साताबाट सुरु हुने भएको छ । ए डिभिजनमा रहेका १४ क्लबमध्येका चार क्लबले मंगलबार लिग रोक्न अखिल नेपाल फुटबल संघ (एन्फा) लाई ज्ञापन पत्र बुझाएका छन् ।
तर, अखिल नेपाल फुटबल संघ (एन्फा) का अध्यक्ष कर्माछिरिङ शेर्पाले चार क्लबको ज्ञापनपत्रले फरक नपर्ने भन्दै निर्धारित समयमा नै लिग सुरु हुने बताएका छन् ।
ललितपुरका चार क्लबले कोरोना महामारीमा लिग सञ्चालन गर्न कठिन हुने भन्दै लिग रोक्न अखिल नेपाल फुटबल संघ (एन्फा) का महासचिव इन्द्रमान तुलाधरलाई ज्ञापन पत्र बुझाएका थिए । सोही विषयलाई लिएर विभिन्न टिकाटिप्पणी भइरहेको अवस्थामा एन्फाका अध्यक्ष कर्माछिरिङ शेर्पाले कुनै क्लबले लिग रोक्न दिएको ज्ञापन पत्रले केही फरक नपर्ने भन्दै निर्धारित मितिमै लिग हुने बताए ।
सहिद स्मारक ए डिभिजन लिग २०२१ असोज ३ देखि आयोजना गर्ने तालिका एन्फाले यसअघि नै सार्वजनिक गरिसकेको छ । एन्फाले ए डिभिजन लिगका लागि खेलाडी दर्ता साउन १५ गतेबाट खुला पनि गर्ने निर्णय गरेको छ । चार क्लबको सहभागिता हुनेमा आशावादी रहेको र आइतबार छलफल हुने उनले बताए । लिगमा सहभागी नभए लिग नियामवली अनुसार हुने अध्यक्ष शेर्पाले बताए ।
असोजबाट हुने लिगमा बी डिभिजन लिगबाट बढुवा भएको सातदोबाटो युथ क्लबसहित १४ क्लबले प्रतिस्पर्धा गर्दैछन् ।
शीर्ष डिभिजन लिग करिब ६ महिना सञ्चालन गर्ने तयारी गरेको छ । फरक ढाँचामा सञ्चालन गर्न लागिएको लिगमा पहिलो चरणमा सबै क्लबले एकापसमा प्रतिस्पर्धा गर्नेछन् भने त्यसपश्चात शीर्ष ८ टोलीले उपाधिका लागि प्रतिस्पर्धा गर्नेछन् ।
Categorized in खेलकुद
