क्वालिटी नूडल्स उद्योगमा स्टोर इन्चार्ज भई कार्यरत साहको विगत तीन वर्षदेखि परियारसँग अवैध यौन सम्बन्ध रहेको अनुसन्धानमा पत्ता लागेको जिल्ला प्रहरी कार्यालय मोरङका प्रमुख विश्व अधिकारीले जानकारी दिनुभयो । मृतक परियारले आरोपित साहको डेरामा दैनिक जाने, खाना बनाइदिने, कपडा धोइदिने लगायतका घरेलु कार्य गर्ने गरेको र बेलाबेलामा घुम्न जाने गरेको प्रहरी नायब उपरीक्षक मानबहादुर राईले जानकारी दिनुभयो । आरोपित साहले मृतक परियारलाई यही माघ २१ गते मोबाइल गर्दा नउठाएको, कोठामा ताल्चा लगाई सम्पर्कविहीन भएकाले खोज्ने क्रममा मोरङको बाँसबारीमा भेटी मोटरसाइलमा सँगै विराटनगर–१२ स्थित चक्रपथ हुँदै मलङ्गवाको पश्चिम उखुबारीमा आपसी विवादका क्रममा रिसको अवेगमा सलले घाँटी थिची बाँसलाई धारिलो हतियार बनाई हत्या गरेको स्वीकारेका छन् ।

प्रहरीले माघ २४ गते बेवारिस अवस्थामा फेलाको परियारको मृत शरीरलाई पहिचानका लागि स्थानीय एफएम रेडियो, सामाजिक सञ्जालमा सार्वजनिक गरेको दुई घण्टाभित्र सम्पूर्ण विवरण प्राप्त भएको प्रमुख अधिकारीले जानकारी दिनुभयो । परियारका श्रीमान् वसन्त परियार इलाममा कार्य गर्ने गरेको र श्रीमती हराएको सम्बन्धमा सोधिखोजी गर्दा साहको नामसहित जाहेरी इलाका प्रहरी कार्यालय मोरङको निमुवामा दिएकोमा अनुसन्धान कार्यमा सहज भएको प्रहरीले जनाएको छ । प्रहरीले मृतक परियारलाई घटनास्थलमा बोकेर लगेको साहले प्रयोग गर्ने मोटरसाइकल र मोबाइल दुई थान बरामद गरेको छ । मृतक परियारका १६ र १२ वर्षीय दुई छोरी छन् । परियारको हत्यारा पत्ता लगाउन प्रहरीले प्रशिक्षित प्रहरी कुकुरसमेत प्रयोग गरेको थियो । प्रहरीले आरोपी साहलाई थप अनुसन्धानका लागि जिल्ला अदालत मोरङमा म्याद थप गरेको छ । यसैगरी प्रहरीले मोरङको रङ्गेली–७ स्थित संसारी माईस्थान मन्दिरमा माताको शिरमा लगाउने चाँदीको मुकुट, छत्र, त्रिशूल, पित्तलको गणेश र छोटी माताको मूर्ति गरी रु ११ लाख ३५ हजार बराबरको सामान चोरी गर्ने चोरलाई पक्राउ गरी आज यहाँ सार्वजनिक गरेको छ । रङ्गेली नगरपालिका–३ बस्ने भुवन पराजुलीले यही माघ २२ गते राति १०ः५४ बजे उक्त सामान चोरी गरेको सिसी क्यामरा रेकर्डमा देखिएको छ । आरोपित पराजुलीले गम्छाले मुख छोपी मन्दिरमा कोही नभएको बेला पर्खाल नाघी चोरी गरेको प्रहरीले जनाएको छ । जिल्ला प्रहरी कार्यालयले अनुसन्धानका क्रममा सिसी क्यामरा रेकर्डको आधारमा निजले प्रयोग गर्ने ज १२ प ५४६८ नं को मोटरसाइकलबाट निजलाई पक्राउ गरेको प्रहरी प्रमुख अधिकारीले बताउनुभयो । निजको साथबाट चोरी भएको सम्पूर्ण सामग्री प्रहरीले बरामद गरेको छ ।