STC 810x100 adv
janswastha 11 11 78

‘मिस्टर मोडल अफ द वर्ल्ड नेपाल'काे उपाधि तण्डुकारलाई

Janjati Khabar – विजयरत्न असंबरे | २०७९ भाद्र २७, सोमबार

काठमाडौं– काठमाडौंका २२ वर्षीय मोडल मिलेनियम तण्डुकार शाहले ‘मिस्टर मोडल अफ द वर्ल्ड नेपाल –२०२२’ उपाधि जितेका छन् ।

भक्तपुरको राधे राधेस्थित हेरिटेज गार्डेनमा शनिवार आयोजित ग्राण्ड फिनालेमा ५ फिट ११ ईञ्च शारीरिक उचाइ भएका मोडल तण्डुकारले आफ्नो २१ जना प्रतिस्पर्धीलाई पछाडि पार्दै उपाधि चुमेका हुन् ।

विजेता तण्डुकारले यो उपलब्धिसँगै यही नोभेम्बर ३ देखि ७ सम्म थाईल्याण्डको बैंककमा हुने मिस्टर मोडल अफ द वर्ल्ड–२०२२ मा नेपालको प्रतिनिधित्व गर्ने मौका पाएका छन् । 

उक्त प्रतियोगितामा विश्वका विभिन्न देशका उत्कृष्ट मोडलहरुको सहभागिता रहने छ ।  कोरोना महामारीका कारण मिस्टर मोडल अफ द वर्ल्डको आयोजना २०२० र २०२१ मा भने प्रतियोगिता हुन पाएको थिएन भने यसपटक बैंककमा  तेस्राे संस्करण हुन लागेको हो ।

प्रतियोगितामा तण्डुकारले मिस्टर पब्लिक च्वाईसको टाइटल अवार्डसमेत जितेका छन् । फेसन मोडलको रुपमा सक्रिय तण्डुकार स्नातक तह तेस्रो वर्षमा अध्ययनरत छन् ।

यसअघि सन् २०१८ मा सम्पन्न उक्त प्रतियोगितामा नेपालको प्रतिनिधित्व गरेका मोडल तथा अभिनेता डा. दिक्पाल कार्कीले मोडल अफ द वर्ल्ड २०१८ को उपाधि नै जित्न सफल भएका थिए । सन् २०१९ मा भने मनोज गुरुङले उक्त प्रतियोगितामा नेपालको प्रतिनिधित्व गरेका थिए ।

प्याजेन्ट नेपाल इन्टरनेशनल तथा ब्राइट इभेन्ट म्यानेज्मेन्टले संयुक्त रुपमा आयोजना गरेको पुरुष मोडलहरुको यो प्रतियोगितामा आभिनेष श्रेष्ठले फर्स्ट रनर्सअप तथा आकाश महर्जनले सेकेण्ड रनर्सअपको उपाधि जित्न सफल भएका छन् । प्रतियोगितामा सफल न्यौपाने तथा धिरज बोगटीले क्रमशः थर्ड रनर्सअप तथा फोर्थ रनर्सअपमा चित्त बुझाएका छन् ।

त्यस्तै गरी सुलक्स चापागाईंले एड्भोकेसी एम्बासडर तथा कमलकुमार चौधरीले यूथ एम्बासडरको उपाधि जितेका छन् भने  मनिष पासवानले मिस्टर मल्टिमिडिया, आभिनेष श्रेष्ठले मिस्टर फिजिक्स, अंकित प्रताप सिंहले मिस्टर फोटोजेनिक तथा सफल न्यौपानेले अनलाइन भोटिङ स्टारको उपाधि जित्न सफल भए ।

प्रतियोगिताको निर्णायकमा मिस नेपाल वर्ल्ड २०१५ इभाना मानन्धर, मिस नेपाल अर्थ २०१८ प्रिया सिग्देल, टेलिभिजनकर्मी बिना श्रेष्ठ, भारतको नन्दनी हर्बलका प्रबन्ध निर्देशक हितेश लिम्बानी, म्यानहन्ट इन्टरनेशनल नेपाल २०१२ सनिश शाक्य, अभिनेता एसराज गराच, फेसन कोरियोग्राफर हिमानी सुब्बा, फेसन डिजाइनर रोबिन परियार, फेसन डिजाइनर ज्वालाराज पोखरेल, फेसन डिजाइनर सुक्निता चौलागाईं, मेकअप आर्टिष्ट शैलजा शाह, हेयर स्टाइलिष्ट सोनु कर्ण तथा मिसेस आइकन भक्तपुर २०२१ सोनिया झ्याखो निर्णायकको रुपमा रहेका थिए ।

शनिवार सफलतापूर्वक सम्पन्न भएको यो प्रतियोगितामा एन प्लस प्रोफेसनलले टाइटल प्रायोजन गरेको थियो ।

मिस्टर मोडल अफ द वर्ल्ड नेपालका इभेन्ट डाइरेक्टर मोडल दिक्पाल कार्की हुन् भने क्रियटिभ डाइरेक्टर मोडल अक्षय जंग रायमाझी रहेका छन् । म्यानेजिङ डाइरेक्टर आशिष नापित रहेका छन् भने इभेन्ट म्यानेजर राजन बुढाथोकी रहेका छन् ।

Categorized in साहित्य-कला
Newa Online Adv