पेट्रोलियम पदार्थको मृल्यवृद्धिमा नेविसंघको विराेध
Janjati Khabar – Janjati Khabar | २०७८ जेठ ४, मंगलबार
नेपाल विद्यार्थी संघले पेट्रोलियम पदार्थमा भएको मुल्यवृद्धिको विरोध गरेको छ।
नेविसंघका महामन्त्री बलदेव तिमल्सिनाले कोरोना महामारीले जनजीवन कष्टकर बनाइरहेको अवस्थामा सरकार भने महँगी बढाउन तल्लीन रहेको आरोप लगाउँदै विरोध जनाएका हुन्।
रोजगार, आय–आम्दानी र अवसर गुमेको स्थितिले आफू र आफ्नालाई बचाउने कसरी भन्ने संकटपुर्ण अवस्थामा पनि अनेक बाहानामा सरकार जनताको ढाड सेक्न तल्लीन छ, महामन्त्री तिमल्सिनाले भने, भ्रष्टाचारमा लिप्त सरकारले पुनः पेट्रोलियम पदार्थको मूल्य बढाएको छ,उक्त निर्णयको नेपाल विद्यार्थी संघ घोर भर्सना गर्दछ।
नेपाल आयल निगमले आइतवार राति १२ बजेदेखि लागू हुने गरी पेट्रोल, डिजेल–मट्टितेल तथा हवाई इन्धन (आन्तरिक उडान) को साविकको खुद्रा बिक्री मूल्यमा प्रतिलिटर २ रुपैयाँले बढाइएको छ भने अब पेट्रोल १ सय २३, डिजेल–मट्टितेल १ सय ६ र हवाई इन्धन ७८ प्रतिलिटर उपभोक्ताले तिर्नुपर्ने छ।
नेविसंघले पेट्रोलियम पदार्थमा गरिएको मृल्यवृद्धि तत्काल फिर्ता गर्नसमेत आग्रह गरेको छ।
