निवर्तमान मुख्यमन्त्री पौडेलको र्यालीसहित बहिर्गमन
Janjati Khabar – Janjati Khabar | २०७८ भाद्र ३, बिहिबार
मकवानपुर - बागमती प्रदेशका पूर्व मुख्यमन्त्री डोरमणि पौडेलले बिहीबार मुख्यमन्त्री निवास छाडेका छन् । बुधवार मुख्यमन्त्रीबाट राजीनामा दिएका पौडेलले बिहीबार सरकारी निवास छाडेका हुन् ।
उनलाई बृहत् मोटरसाइकल र्यालीसहित एमाले कार्यकर्ताहरूले उनको निजी निवाससम्म पुर्याएका थिए । हेटौँडा–२ स्थित चौकिटोलमा रहेको मुख्यमन्त्री निवासमा डोरमणि पौडेल ४३ महिना बिताएका छन् । ४३ महिना प्रदेश सरकारको नेतृत्व गरिरहँदा प्रदेशको १३ जिल्लालाई कसैले पनि औँला उठाउन नसकेको उनले बताए । १३ वटै जिल्लामा विकासका कामहरू भएको भन्दै प्रदेशलाई पनि गति दिएको उनले बताए ।
सङ्घीय सरकार र माथिल्लो तहमा बस्ने नेताहरूलाई एकताको सन्देश दिन राजीनामा दिएका निवर्तमान मुख्यमन्त्री पौडेलले पछिल्लो केही समयदेखि नै यसको लागि तयारी भइरहेको बताए । ‘देख्दा अकस्मात् यस्तो देखिन् सक्छ, तर यस्तो भएको हैन, सबै व्यवस्थित रुपमा भएको हाे ‘ उनले भने ।
