कर्मचारीको अभावः सेवाग्राही मार्कामा
Janjati Khabar – जनजाति खबर | २०७६ जेठ ५, आइतबार
कुनै वेला धेरै कर्मचारीको पहिलो रोजाईमा परेको मालपोत कार्यलय कपिलवस्तुमा यतिवेला कर्मचारीको अभाव देखिएको छ ।
कर्मचारी अभावका कारण सेवाग्राहीले समयमा काम हुन नसक्दा सास्ती खेप्दै आएका छन् । सेवाग्राहीको गुनासो सम्वोद्धन र कर्मचारीको पदपूर्ति हुन नसक्दा कृषि मन्त्री चक्रपाणी खनाल देखि प्रमुख जिल्ला अधिकारी अर्जुन प्रसाद पोखरेलाई चिन्तित बनाएको छ । यस विषयमा पटक पटक कार्यलयले उहाँहरुको ध्यानाकर्षणसमेत गराउँदै आएको छ । तर पनि अहिलेसम्म कार्यालयमा दरबन्दी अनुसारको कर्मचारीको पदपूर्ति हुन सकेको छैन् ।
चरम अभावको अवस्था
जिल्ला मालपोत तथा भूमिसुधार कार्यालय कपिलवस्तुमा खरिदार देखि उपसचिव सम्मका ३८ कर्मचारीको दरबन्दी छ । कार्यालय सहयोगी वाहेक अहिले कार्यालयमा १२ कर्मचारी मात्र छन् भने १० कार्यलय सहयोगी छन् । कर्मचारीको अभावका कारण एउटा कर्मचारीले २÷३ वटा फाँटको जिम्मेवारी सम्हाल्नुपरेको छ । मालपोत कार्यलयमा सबैभन्दा महत्वपूर्ण मानिएको मुद्दा फाँट र मोठ फाँटमा कर्मचारी नहुँदा सेवाग्राहीले सवैभन्दा बढी समस्या भोग्दै आएका छन् ।
एक उपसचिब, एक अधिकृत, आठ नासु र ६ खरिदार, २ कम्प्युटर अपरेटर, एक चालक र एक लेखापालको दरबन्दी खाली रहेको छ । कार्यालयमा आवश्यक संख्यामा कर्मचारी नहुँदा दैनिक कामकाज प्रभावित बनेको मालपोत कार्यलयका अधिकृत ऋषिराम पौडेलले बताउनुभयो ।
कर्मचारी अभावका विषयमा सम्बन्धीत मन्त्रालयदेखि सरोकारवाला सबै निकायमा जानकारी गराउँदा पनि अहिलेसम्म पदपूर्ति हुन नसकेको उहाँले बताउनुभयो ।
