Salt Trading
Swasthya Mantralaya
Prabhu Bank Header Bottom

एमसीसी अघि नबढाउन प्रधानमन्त्रीलाई प्रकाण्डकाे चेतावनी

Janjati Khabar – Janjati Khabar | २०७८ भाद्र २६, शनिबार

काठमाडौं - नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीका नेता खड्गबहादुर विश्वकर्मा ‘प्रकाण्ड’ ले अमेरिकी परियोजना मिलेनियम च्यालेञ्ज कर्पोरेसन (एमसीसी) अघि बढाउने ‘मुर्खता’ नगर्न प्रधानमन्त्री शेरबहादुर देउवालाई चेतावनी दिएका छन् ।

एमसीसीविरुद्धको पहिलो चरणको आन्दोलनका कार्यक्रम घोषणा गर्दै उनले एमसीसीलाई नेपालबाट सधैंका लागि भगाउन एकखालको आन्दोलनको आवश्यकता रहेको बताए । एमसीसी राष्ट्रियतासँग सम्बन्धित मात्र नभए देशको जल स्रोतलगायत अन्य प्रकृति संरक्षणको विषय समेत रहेको बताउँदै उनले यसको विरुद्धमा सबै एकजुट हुनुपर्ने बताए ।

उनले एमसीसीको विरुद्धमा पार्टीले आन्दोलनको कार्यक्रम घोषणा गरेको जानकारी गराउँदै संसद्बाट एमसीसी पास गराउने षड्यन्त्र भइरहेको बताए । ‘प्रकाण्ड’ ले भदौ २८ गते राजधानीमा एमसीसीविरुद्ध वृहत् प्रदर्शन गरिने जानकारी गराए । प्रधानमन्त्री शेरबहादुर देउवाले मुर्खता गरे भने देश आन्दोलनको भुमरीमा फस्ने चेतावनी उनले दिए ।

आफूहरूको दल एमसीसीको विरुद्ध सङ्घर्षमा रहेको बताउँदै उनले ५० करोड अमेरिकी डलरमा देशलाई बेच्न खोजेको आरोप लगाए । नेपालकै रकमलाई राम्रोसँग खर्च गरियो विकास पर्याप्त हुने तर ५० करोड अमेरिकी डलरमा कमिसन खान पाइन्छ भन्दै केही नेताहरू त्यो पास हुनैपर्ने अडानमा रहेको उनले दाबी गरे । यदि एमसीसी पास भएर लागु भयो भने देशमा आन्दोलनको आँधीबेहरी ल्याउने चेतावनी पनि दिए ।

फरक प्रसङ्गमा, सरकारसँग तीन बुँदे सहमति गरेको तर त्यो कार्यान्वयन नभएको बताउँदै नेता प्रकाण्डले नेपाली क्रान्तिविरुद्ध षड्यन्त्र भएको बताए । तीन बुँदे सम्झौता गरे पनि आफ्ना पार्टीका नेता तथा कार्यकर्तालाई नछाडेको दाबी गर्दै उनले आफ्ना केही नेताहरू जेलबाट कानुनअनुसार रिहा भएको र यसमा सरकारको कुनै सहयोग नरहेको दाबी गरे ।

Categorized in राजनीति
Newa Online Adv